Осори Пешвои миллат

Осори нашрии Хонаи китоби Тоҷикистон

Омори матбуоти Ҷумҳурии Тоҷикистон

Пиряхҳо – манбаи оби тоза

Хабар Дида шуд: 74

Бобоев, А. Пиряхҳо – манбаи оби тоза [Матн]: маълумотнома ба истиқболи ҷашни 35-солагии Истиқлолияти давлатии Ҷумҳурии Тоҷикистон / А. Бобоев; муҳ. З. Назрулозода. – Душанбе: ҶДММ “Ашуриён”, 2026. – 32 с.; 20 см. – 100 н. – ISBN 978-9906-9932-0-3

Мундариҷа: Тавзеҳот. – С.3; Ҳифзи пиряхҳо – раҳоӣ аз офатҳои хатарзо. – С.5; Пиряхҳои Осиёи Марказӣ босуръат таназзул меёбанд. – С.8; Нақши яхбандиҳои қадим дар ташаккули криосфера. – С.11; Обу пиряхҳои худро ҳифз намоем. – С.15; Пешвои миллат ва масъалаи глобалии об. – С.16; Пиряхҳо – манбаи сарчашмаи оии дарёҳои Ҷумҳурии Тоҷикистон. – С.21; Оқибати нобудшавии пиряхҳо ногувор аст. – С.25.

 

 

 

 

 

Табрикоти директори Муассисаи давлатии «Агентии миллии Созмони байналмилалии рақамгузории стандарти китоб – Хонаи китоби Тоҷикистон», Зафари Шариф бахшида ба ҷашни байналмилалии Наврӯз

Хабар Дида шуд: 216
  Бо камоли эҳтиром ва самимияти бепоён фарорасии ҷашни фархундаи миллӣ – Наврӯзи оламафрӯз, айёми бедории табиат, фасли баҳори гулбадомонро аз номи роҳбарияти Муассисаи давлатии «Хонаи китоби Тоҷикистон» ба ҳамкасбон, аҳли илму фарҳанг ва тамоми ҳамватанони бурунмарзӣ табрику таҳният менамоям.
   Наврӯз аз қадимтарин ва муқаддастарин ҷашнҳои ниёгони мо ба шумор рафта, рамзи эҳёи табиат, оғози зиндагии нав, поксозии қалбу рӯҳ ва эҳтиром ба арзишҳои волои инсонӣ мебошад. Бо фарорасии ин ҷашни зебо табиат либоси сабз ба бар карда, замин аз нав зинда мешавад ва инсон низ бо умеду орзуҳои нек ба сӯи фардои дурахшон қадам мегузорад. Ин ҳама нишонаи он аст, ки Наврӯз танҳо як ҷашн нест, балки мактаби бузурги ахлоқ, инсондӯстӣ ва фарҳанг мебошад.
   Наврӯз моро ба сулҳу ваҳдат, дӯстиву бародарӣ ва ҳамдигарфаҳмӣ ҳидоят менамояд. Дар ин айёми зебо мардум бо дилҳои пок ва ниятҳои нек ба ҳамдигар дасти дӯстӣ дароз намуда, кинаву адоватро аз қалбҳои худ дур месозанд. Ин аст, ки Наврӯз дар таърихи миллати мо ҳамчун ҷашни муттаҳидсозанда ва таҳкимбахши арзишҳои миллӣ шинохта шудааст.
   Муассисаи давлатии «Хонаи китоби Тоҷикистон» ҳамчун маркази муҳимми фарҳангиву маърифатӣ дар рушди соҳаи китобдорӣ, ҳифз ва муаррифии мероси фарҳангӣ, бақайдгирии адабиёти чопӣ ва пешбурди фаъолияти библиографӣ нақши назаррас дорад. Кормандони муассиса бо ҳисси баланди масъулиятшиносӣ ва муҳаббат ба касб дар самти ҷамъоварӣ, ҳифз ва таблиғи осори илмиву адабӣ фаъолияти пурсамар доранд.
   Наврӯз барои мо имконияти хубест, то бори дигар ба арзишҳои миллӣ рӯ оварда, фарҳанги бойи ниёгонро гиромӣ дорем ва онро ба наслҳои оянда ба мерос гузорем. Хонаи китоби Тоҷикистон дар ин раванд метавонад ҳамчун як маркази муҳими иттилоотӣ ва фарҳангӣ нақши муассир бозида, тавассути захираҳои худ ба инъикоси анъанаҳо ва расму оинҳои наврӯзӣ мусоидат намояд.
Дар ин айёми фархунда ба ҳар яки Шумо саломатии бардавом, рӯҳи болида, хотири ҷамъ, саодати рӯзгор ва барори кор орзумандам. Бигзор дар ҳар хонадон фазои оромиву осудагӣ ҳукмфармо буда, меҳру муҳаббат ва ҳамдигарфаҳмӣ ҳамеша пойдор бошад.
   Наврӯзатон муборак бод!

МАҶЛИСИ НАЗДИ ДИРЕКТОРИ МУАССИСАИ ДАВЛАТИИ ‎‎“ХОНАИ КИТОБИ ТОҶИКИСТОН”‎

Хабар Дида шуд: 168
   Санаи 19-уми марти соли 2026 дар Муассисаи давлатии «Агентии миллии Созмони байналмилалии рақамгузории стандарти китоб – Хонаи китоби Тоҷикистон» ҷамъомади навбатии назди директори муассиса, доктори фалсафа (PhD), доктор аз рӯйи ихтисоси китобхонашиносӣ, библиографишиносӣ ва китобшиносӣ - Зафари Шариф баргузор гардид, ки дар он аҳли раёсат, мудирони шуъбаҳо, мутахассисон ва кормандон иштирок намуда, масъалаҳои муҳими фаъолияти муассиса мавриди баррасӣ қарор гирифтанд. Аз ҷумла, масъалаҳои марбут ба рушди фаъолияти китобдорӣ, такмили низоми рақамгузории стандартии байналмилалии китоб (ISBN), таҳияи Солномаи матбуоти Ҷумҳурии Тоҷикистон, назорати стандарти нашр, ҷамъоварии нусхаҳои ҳатмӣ ва ҳифзу нигоҳдории мероси чопӣ муҳокима шуданд.
   Зимни баромади худ Зафари Шариф ба нақши муҳимми Хонаи китоб дар ҷамъоварӣ, бақайдгирӣ ва муаррифии маҳсулоти чопии кишвар таъкид намуда, иброз дошт, ки дар шароити муосир истифодаи технологияҳои рақамӣ ва такмили пойгоҳи иттилоотӣ аз самтҳои афзалиятнок ба ҳисоб мераванд. Ҳамчунин, масъалаи омодагӣ ба ҷашни Наврӯз ва баргузор намудани чорабинии фарҳангиву маърифатӣ дар муассиса мавриди таваҷҷуҳ қарор гирифт.
   Қайд гардид, ки Хонаи китоб ҳамчун маркази муҳимми библиографӣ бояд дар инъикоси арзишҳои миллӣ, аз ҷумла ҷашни Наврӯз дар матбуот ва дигар воситаҳои ахбори омма саҳми назаррас гузорад. Дар ин замина, ба кормандон дастур дода шуд, ки фаъолияти пажуҳишиӣ-библиографии худро густариш дода, маводи марбут ба Наврӯзро ҷамъоварӣ ва ба таври муназзам пешниҳод намоянд.
   Дар анҷоми ҷамъомад роҳбари муассиса ҳамагонро ба ҷашни байналмилалии Наврӯз табрику таҳният гуфта, ба кормандон ҷиҳати иҷрои саривақтии вазифаҳо, баланд бардоштани сатҳи касбият ва масъулиятшиносӣ дастуру супоришҳои мушаххас дод.

Тавсифи асари "Таърихи амирони манғитии Бухоро"-и Садриддин Айнӣ

Хабар Дида шуд: 198
    Айнӣ, С. Таърихи амирони манғитии Бухоро [Матн] / Садриддин Айнӣ. – Тошканд, 1923. – 153 с.
 
   Таърихи амирони манғитии Бухоро яке аз асарҳои машҳури устод Садриддин Айнӣ мебошад, ки ҳамаи муҳиббону мухлисони устод Айнӣ ин асарро хондаанд ва ё дар борааш шунидаанд. Устод Айнӣ дар аввали китоб зери унвони «Як ду калима аз тарафи мураттиб» чунин гуфтааст: «Хонандагони гиромиро пинҳон ва пушида мабод, ки мураттиби ин авроқ дер боз дар бораи таърихи амирони манғитии Бухоро татабуъ ва ҷустуҷу доштам. Дар соли 1339 моҳи муҳаррам  (сентябри 1920-и мелодӣ) ба муносибати инқилоби кабири Бухоро ба воситаи маҷаллаи «Шуълаи инқилоб» порча-порча нашраш оғоз карда шуд.
   Чун шуъбаи нашриёти давлатии ҷумҳурияти Бухоро ва назорати маорифи Бухоро ҷамъ ва тадвини ин авроқи парешонро хоҳиш намуд, дигар бора хеле саъй ва кушиш ба кор бурда бо ҳак (пок кардан) ва ислоҳ ва бо илова ва тафсили баъзе мавориди вақоеъ ва таини мабаъ ва маъхазҳо дар қайди калимот кашида шуд».
   Устод Айнӣ дар ин китоб аз таърихи ҳукмронии аввалин амири манғитии Бухоро Раҳимхон ибни Ҳаким оғоз карда, то ба охирон сулолаи онҳо Амир Олим дар бораи ҳаёту фаъолият, тарзи ҳукмронӣ, авзои сиёсӣ, иҷтимоӣ, иқтисодӣ ва бархе ҳодисаҳои ба вуқуъпайвастаи даврони онҳо сухан карда, дар охир чунин қайд кардааст: «Муддати ҳукумати Амир Олим аз рӯзи ҷулус (ба тахт нишастан) то рӯзи фирораш аз Бухоро ба ҳисоби қамарӣ: 9 солу 11 моҳу 11 руз ва ба ҳисоби шамсӣ: 9 солу 7 моҳу 25 руз аст. Амирони манғитӣ аз соли 1170 ҳиҷрӣ то соли 1338 муддати 168 сол дар Бухоро ҳукмронӣ кардаанд». Устод Айнӣ китобро бо овардани латифа ҷамъбаст намуда, сарчашмаҳои истифода бурдаашро ёдовар шудааст. Дар охир феҳристи фаслҳо ва саҳоифи онҳо, феҳристи (калимаҳои) хато ва савоб (дуруст) бо муайян намудани саҳифа ва сатри он ҷой дода шудааст.
   Ин китоб соли 1923 ба забони тоҷикӣ ва ҳуруфи форсӣ дар шаҳри Тошканд бо теъдоди 3000 нусха чоп шудааст.
 
   Манбаъ: Пиров, С. Муаррифии "Таърихи амирони манғитии Бухоро"-и Садриддин Айнӣ (чопи соли 1923) [Матн] / С. Пиров // Репертуари китоби солҳои 1922-1930-и Хонаи китоби Тоҷикистон: бо услуби сарчашмашиносӣ. – Душанбе: Кайҳон, 2021. – С.11-12.
 
Китобшиноси дараҷаи I-и шуъбаи
маълумотдиҳӣ-библиографӣ ва омори матбуоти
МД “Хонаи китоби Тоҷикистон”
Пиров СИРОҶИДДИН

ТАНЗИМИ ҲУҚУҚИИ МЕНЕҶМЕНТИ КИТОБДОРӢ ДАР ШАРОИТИ РУШДИ ҶОМЕАИ ИТТИЛООТӢ

Хабар Дида шуд: 141

 

Танзими ҳуқуқии менеҷменти китобдорӣ яке аз омилҳои муҳими рушди фаъолияти китобхонаҳо дар шароити муосири кишвар ба шумор меравад. Дар давраи ҷаҳонишавӣ ва рушди босуръати технологияҳои иттилоотӣ, китобхонаҳо на танҳо ҳамчун макони нигоҳдории китобҳо, балки ҳамчун марказҳои иттилоотӣ, фарҳангӣ ва маърифатӣ фаъолият менамоянд.
Фаъолияти китобдорӣ, пеш аз ҳама ба китобхонаҳо тааллуқ дошта, дар навати худ онҳо ба ҳайси ташкилот баромад мекунанд ва самти асосии фаъолияти онҳо расонидани иттилоот ва маводу маълумоти мухталиф ба муҳақиқон, донишҷуён, унвонҷуён, докторантон, номзадони илм ва қишрҳои ҷомеа мебошад.
Ҳамин тариқ, ҳуқуқи китобдорӣ як қисми ҳуқуқи иттилоотӣ ба ҳисоб рафта, маҷмӯи меъёрҳои ҳуқуқиро дар худ ифода менамояд. Истилоҳи «ҳуқуқи китобдорӣ» ба номи объекти асосии он, яъне китобхона асос меёбад, ки вобаста ба он, ё худ дар алоқамандӣ бо он муносибатҳои ҷамъиятӣ ба низом дароварда мешаванд.
Ҳар чи қадаре, ки заминаҳои ҳуқуқии фаъолияти китобдорӣ ҳамаҷониба вусъат бахшида шавад, ҳамон андоза имконияти рушди соҳаи мазкур зиёд мегардад. Бар замми ин, мушаххасгардонии ҳуқуқи китобдорӣ барои донишмандон, муҳақиқон ва коршиносони муосири соҳаи китобдорӣ ва китобшинос имконият медиҳад, ки проблемаҳои ҷузъӣ ва муҳими ин ҷода ҳалли илмии худро биёбанд.
Инчунин Қонуни Ҷумҳурии Тоҷикистон «Дар бораи фаъолияти китобдорӣ» низ амал менамояд. Дар доираи ин қонун масъалаҳои ҳуқуқии ташкил, ҳифз ва рушди фаъолияти китобдорӣ дар кишварамон муайян мегардад. Дар шароити муосир қонунгузории соҳаи китобдорӣ ба масъалаҳои нав, аз қабили рақамикунонии китобхонаҳо, ташкили китобхонаҳои электронӣ, ҳифзи мероси фарҳангӣ заминаи хубе фароҳам меорад. Дар баробари ин, сиёсати давлатӣ дар соҳаи фарҳанг ва иттилоот низ ба рушди менеҷменти китобдорӣ таъсири калон мерасонад. Дар ин самт фаъолияти Вазорати фарҳанги Ҷумҳурии Тоҷикистон нақши муҳим дорад, чунки сиёсати давлатиро дар соҳаи китобдорӣ амалӣ намуда, фаъолияти китобхонаҳоро ба роҳ меандозад.
Дар шароити имрӯза ташаккули менеҷменти китобдорӣ бомуваффақият анҷом гирифта истодааст. Менеҷменти китобдорӣ на бо манфиатҳои илмию академӣ, балки бештар ба манфиатҳои иҷтимоии ҷомеа ва фаъолияти самароноки китобхонаҳо дар тамоми самтҳо алоқаманд аст. Менеҷменти муосири китобдорӣ талаб менамояд, ки дар баробари риояи меъёрҳои ҳуқуқӣ, усулҳои нави идоракунӣ низ ҷорӣ карда шаванд.
Хулоса Танзими ҳуқуқии менеҷменти китобдорӣ заминаи муҳими фаъолияти самараноки китобхонаҳо буда, барои рушди фарҳанг, баланд бардоштани маърифатнокии ҷомеа ва дастрасии шаҳрвандон ба иттилоот мусоидат мекунад.

 

Саъдӣ Шамсуддинов,
сарнозири шуъбаи нозироти
стандарти нашр ва воридоти
нусхаҳои ҳатмии МД “АМСБРСК –
Хонаи китоби Тоҷикистон”

Маросими ифтитоҳи филиали кафедраи китобхонашиносӣ ва библиографишиносии МДТ “ДДФСТ ба номи Мирзо Турсунзода” дар Муассисаи давлатии “Агентии миллии Созмони байналмилалии рақамгузории стандарти китоб – Хонаи китоби Тоҷикистон”

Хабар Дида шуд: 134

   Санаи 14-уми марти соли 2026 дар Муассисаи давлатии “Агентии миллии Созмони байналмилалии рақамгузории стандарти китоб – Хонаи китоби Тоҷикистон”-и Вазорати фарҳанги Ҷумҳурии Тоҷикистон филиали кафедраи китобхонашиносӣ ва библиографишиносии МДТ “ДДФСТ ба номи Мирзо Турсунзода” ифтитоҳ гардид. Дар маросими ифтитоҳи филиали кафедра муовини Вазири фарҳанги Ҷумҳурии Тоҷикистон муҳтарам Бобозода Фаридун Толибҷон ва ректори МДТ “ДДФСТ ба номи Мирзо Турсунзода” муҳтарам Назарзода Маҳмуд Мирзо, олимону адибон ва донишҷӯён иштирок намуданд. Маросимро директори Муассисаи давлатии “Агентии миллии Созмони байналмилалии рақамгузории стандарти китоб – Хонаи китоби Тоҷикистон”-и Вазорати фарҳанги Ҷумҳурии Тоҷикистон доктори фалсафа (PhD), доктор аз рӯйи ихтисоси китобхонашиносӣ, библиографишиносӣ ва китобшиносӣ - Зафари Шариф ифтитоҳ намуда, меҳмонону ҳозиринро ба маросими кушодашавии филиали кафедра хайрамақдам намуданд.

   Сипас, Зафари Шариф дар суханронии худ зикр намуданд, ки “тарбияи мутахассисони болаёқат ва ҷавобгӯ ба бозори меҳнат дар маркази таваҷҷуҳи Ҳукумати Ҷумҳурии Тоҷикистон қарор дорад. Сарвари давлат дар маҷлиси васеи Ҳукумати Ҷумҳурии Тоҷикистон аз 20-уми январи соли 2020 Вазорати фарҳангро вазифадор намуданд, ки барои тарбияи мутахассисони касбии соҳаи китобдорӣ, ташкили таҷрибаомӯзӣ дар кишварҳои хориҷӣ, ташкили курсҳои омӯзишӣ ва такмили ихтисос чораҷӯӣ намояд. Ифтитоҳи филиали кафедра низ бо дастгирии Вазири фарҳанги Ҷумҳурии Тоҷикистон муҳтарам Сатториён Матлубахон Амонзода ва ба дастгирии ректори МДТ “ДДФСТ ба номи Мирзо Турсунзода” муҳтарам Назарзода Маҳмуд Мирзо дар доираи ин дастуру супоришҳо сурат гирифтаистодааст”.

  1. Шумо дар инҷо:  
  2. Асосӣ